គំនូរពណ៌នៅប្រាសាទនាងខ្មៅខេត្តតាកែវជាប្រាសាទឥដ្ឋ
ប្រាសាទនាងខ្មៅក៏ដូចជាប្រាសាទមួយចំនួនតូចឯទៀតដែរ ដែលត្រូវបានសាងសង់ឡើងនាស.វទី១០ ដែលនៅញ្ជាំងខាងក្នុងមានលំអដោយគំនូរពណ៌ពាក់ព័ន្ធទៅនឹងទេវកថាវិទ្យានៃលទ្ធិព្រហ្មញ្ញសាសនា។
ការស្រាវជ្រាវខាងប្រាង្គប្រាសាទខ្មែរដោយសាលាបារាំងចុងបូព៌ា នៅខែកញ្ញា ឆ្នាំ ១៩៤០ បានឲ្យដឹងថា ផ្នែកខាងក្នុងនៃប្រាសាទនេះ មានគំនូរពណ៌ជាច្រើនផ្ទាំង ជាពិសេសប្រាសាទខាងត្បូង។ ស្នាដៃឯកទាំងនោះ ត្រូវបានខូចខាតយ៉ាងដំណំ នៅឆ្នាំ១៩៤០ ដោយគ្រាន់តែបានបន្សល់ទុកនូវគំនូររូបភាពត្រឹម៣ផ្ទាំងតែប៉ុណ្ណោះ។ ប៉ុន្តែជាអកុសល ដោយមិនបានទទួលនូវការអភិរក្សសមស្របទាន់ពេលវេលា សព្វថ្ងៃមរតកវប្បធម៌ទាំងនោះត្រូវរលុបបាត់បង់អស់ទៅហើយ។
ដូច្នេះ នៅទីនេះ យើងមានភារកិច្ចរំលឹកគំនូរបុរាណនេះឡើងវិញ ដោយភ្ជាប់នូវរូបភាពឯកសារជាភស្តុតាងជាមួយ ដើម្បីឲ្យមតិមហាជនជ្រាបដឹងអំពីមរតកវប្បធម៌បុរាណដែលបានបាត់បង់ទៅ។ ព្រោះថា កម្រណាស់ដែលមានមនុស្សជំនាន់នេះដឹងឮអំពីមរតកវប្បធម៌ខ្មែរនាដើមសម័យអង្គរដែលមានអាយុប្រមាណជា ១០០០ឆ្នាំមកហើយ។
ទន្ទឹមនឹងនេះ យើងក៏ចង់ជម្រាបថា ផ្នែកក្នុងនៃប្រាសាទខ្មែរមួយចំនួន ជាពិសេសនៅលើជញ្ជាំងក៏មានការតុបតែងលំអរដោយគំនូរ និងក្បាច់ក្បូរផងដែរ។ ដូច្នេះគ្មានហេតុផលអ្វីដែលហាមឃាត់យើងមិនឲ្យបញ្ចូលគំនូរបុរាណទាំងនោះក្នុងសមាសធាតុតុបតែងលំអរប្រាង្គប្រាសាទខ្មែរ នាសម័យអង្គរដែរ។ ហេតុដែលយើងលើកបញ្ហានេះឡើង ក៏ដោយសារតែគេច្រើនតែមើលរំលងនូវកេរ្តិ៍ដំណែលដ៏ថ្លៃថ្លានេះ។
ជាទីបញ្ចប់ សូមជម្រាបថា តាមរយៈរូបភាពទាំងនោះ យើងឃើញថា ប្រាសាទនាងខ្មៅត្រូវបានសាងសង់ឡើង ដើម្បីឧទ្ទិសដល់ព្រហ្មសាសនា វិស្ណុនិកាយ។ ម្លោះហើយ គំនូរទាំងនោះសុទ្ធសឹងតែពាក់ព័ន្ធទៅនឹងប្រវត្តិរបស់ព្រះវិស្ណុទាំងអស់៕
ត្រាណេ
Subscribe to:
Post Comments (Atom)
EmoticonEmoticon